காஷ்மீரில்....?

என்ன நடக்கிறது காஷ்மீரில் ?
காஷ்மீரில் நடப்பது வெறுமனே இந்து - முஸ்லீம் பிரச்னையோ, இந்தியா - பாகிஸ்தானுக்கு இடையேயான இடம்பிடிக்கும் போட்டியோ அல்ல ; அதன் வேர் இந்தியப் பிரிவினையில் இருந்து தொடங்குகிறது . காஷ்மீரில் பெரும்பகுதி முஸ்லீம் இருந்தபோதிலும் சுதந்திரத்தின்போது ஹரிசிங் என்ற இந்து மன்னர்தான் காஷ்மீரை ஆண்டு வந்தார் .அவர் இந்தியாவுடனோ, பாகிஸ்தானுடனோ காஷ்மீரை இணைக்க மறுத்தார் . அந்த நிலையில் பாகிஸ்தானின் பஸ்தான் பழங்குடி மக்கள் காஷ்மீர் மீது படை எடுத்தனர் . அதை சமாளிக்க முடியாத ஹரிசிங், நேருவுடன் ஒப்பந்தம் போட்டு காஷ்மீரை இந்தியாவுடன் இணைத்தார் . இப்படித்தான் காஷ்மீர் இந்தியாவுக்கு வந்தது . பின்னர் படிப்படியான நிகழ்வுகளின் காரணமாக அரசியல் சட்டத்தில் 370 - வது பிரிவு புதிதாக உருவாக்கப்பட்டு காஷ்மீருக்கு சுயாட்சி அந்தஸ்து வழங்கப்பட்டது . இந்த இணைப்பில் மிக முக்கியமான அம்சம் என்பது ' காஷ்மீர மக்களிடம் ஓட்டெடுப்பு நடத்த வேண்டும் ' என்பதுதான் . ஆனால், இன்று வரை அப்படி ஓர் ஓட்டெடுப்பு நடத்தப்படவில்ல . நேருவும் அதன் பின் வந்த யாருமே அந்த ஓட்டெடுப்பு நடத்த துணியவே இல்லை . காஷ்மீரில் சின்னச் சின்னதாக இயக்கங்கள் தோன்றி ' சுதந்திர காஷ்மீர் ' கேட்டு ஜனநாயக வழியில் போராடத் தொடங்கினார்கள் . 50 ஆண்டுகள் ஜனநாயகப் போராட்டத்தில் வெறுப்புற்று 1980 -களின் பிற்பகுதியில் போராட்டம், ஆயுத வடிவம் எடுத்தது . காஷ்மீரின் போராட்டக்காரர்கள் இந்தியாவுக்கு எதிராகப் போராடுகிறார்கள் என்பதாலும், அவர்கள் முஸ்லீம்கள் என்பதாலும் சுதந்திரமாக அவர்களுக்கு ஆயுதங்களை வழங்கி தீவிரவாதக் குழுக்களை உற்பத்தி செய்ய ஆரம்பித்தது பாகிஸ்தான் . அதன்பிறகு போராட்டம், தீவிரவாத முகம் எடுக்க ஆரம்பித்தது . அந்த அழகிய பள்ளத்தாக்கு படிப்படியாக ரத்தப் பிரதேசம் ஆன கதை இதுதான் .
பெரும்பகுதி காஷ்மீர் முஸ்லீம்கள் பாகிஸ்தானுடன் இணைவதை விரும்பவில்லை . இரு தரப்பும் முஸ்லீம்கள்தான் என்றாலும் அடிப்படையிலேயே வேறுபாடு இருக்கிறது . பாகிஸ்தானின் முஸ்லீம்கள் ஷன்னி மற்றும் ஷியா பிரிவைச் சேர்ந்தவர்கள் . காஷ்மீரின் முஸ்லீம்கள் ' குஃபி ' வகையைச் சேர்ந்தவர்கள் . தங்களைத் தனித்த தேசிய என வகைப்படுத்தும் காஷ்மீரிகள் ' சுதந்திர காஷ்மீர் ' கேட்கின்றனர் . இதை பாகிஸ்தானோ, இந்தியாவோ இதுவரை கண்டுகொள்ளவில்லை .
--- ஆனந்தவிகடன் , 25. 8. 2010.

குழந்தை பேசவில்லை !

என் குழந்தை பல வாரங்களாகப் பேசவில்லை !
தெற்கே தலைவைத்து நாங்கள் படுத்தது இல்லை
ஊருக்குத் தெற்கே சுடுகாடு இருந்தபோது
தலைவைத்துப் படுக்க
ஒரு திசை இல்லை
இப்போது
ஊரே சுடுகாடாய்
பதுங்கு குழிக்குள்
அழுகிய பிணங்களுடன்
பேசிக்கொண்டு இருந்த என்னுடன்
என் குழந்தை
பல வாரங்களாகப் பேசவில்லை
வெடியோசை
பற்றி எரியும் ஊரகள்
வெட்டி எறியப்பட்ட உடல்கள்
மரண ஓலம்
பிண நாற்றம்
பயம், பீதி, பசி
இவற்றுடன்
பேசாத என் குழந்தை
இதைத் தவிர
என்னுடன் எதுவும் இல்லை
என் வீடு -- வாசல்
என் தாய் -- தந்தை
என் கணவன்
என் மூத்த பிள்ளை
என் உற்றார் உறவுகள்
என் வார்த்தை
என் சுவாசம்
இங்கு எதுவும் எனக்கானது இல்லை
பேசாத என் குழந்தையைத் தவிர
வெள்ளைக் கூடாரத்துக்கு
வந்து சேரும் வரை
முள்வேலிச் சிறைக்குள்
விறைத்த துப்பாக்கிகளின்
கண்காணிப்பில்
எனது உடல்
நொதித்துக்கொண்டு இருக்கிறது
பாழுங்கிணறென !
--- மாலதி மைத்ரி , ஆனந்தவிகடன் . 25. 8. 2010.

பட்டாம்பூச்சிகள் !

இரண்டு பட்டாம்பூச்சிகள் காதலித்தன . யாருக்கு இன்னொருவர் மேல் நேசம் அதிகம் என்பதில் இருவருக்கும் போட்டி . ஒரு தடாகத்திலிருந்த தாமரையைக் காட்டி, " நாளை காலை யார் இதன் மீது முதலில் அமர்கிறார்களோ அவர்களுக்குத்தான் அதிக நேசம் " என்று தீர்மானித்தன . மறுநாள் காலை,, தாமரை மலர்வதற்கு முன்பாகவே ' படபட ' வென சிறகடித்து வந்த ஆண் பூச்சி ஆவலோடு காத்திருந்தது . தாமரை மலர்ந்த அடுத்த விநாடி அதில் அமர்ந்தது . அதிர்ந்தது . தாமரைக்குள்ளே பெண் பட்டாம்பூச்சி செத்துக் கிடந்தது . தன் அன்பை உணர்த்த முதல் நாள் மாலையே வந்து அமர்ந்துகொண்ட அந்த பட்டாம்பூச்சி, தாமரை மூடிக் கொண்டதால் மூச்சுத் திணறி இறந்தது . அந்த வண்ணத்துப் பூச்சியின் நேசம் தான் தாமரையின் வாசமாய் இன்று வரை வாழ்கிறது . சாக்ரடீஸ் . சாக்ரடீசுக்கு மரணதண்டனை விதிக்க அந்த நீதிபதிக்கு விருப்பமில்லை . ஏதென்சை விட்டுச் சென்று விடுங்கள், அல்லது உங்கள் போதனைகளை நிறுத்தி விடுங்கள் என்றார் . அதற்கு சாக்ரடீஸ் ஏதென்சை விட்டு நான் செல்லவிரும்பவில்லை . இருளில் பிறர் தடுமாறுவதைப் பார்த்து நான் அமைதி காக்க முடியாது . எனக்குத் தெரிந்ததைச் சொல்வேன் என்றார் . மரணதண்டனை மட்டுமே வழி என்றார் நீதிபதி . எனக்கு மரணதண்டனை விதிப்பதால் மட்டுமே நீங்கள் புகழடைவீர்கள் . இல்லையென்றால் உங்களை யாருக்குமே தெரியாது என்று கம்பீரமாகச் சொல்லிவிட்டு நகர்ந்தார் சாக்ரடீஸ் . குழந்தைகள் . சில குழந்தைகள் தொடக்கத்தில் மந்தமாக இருப்பார்கள் . அவர்களது பெற்றோருக்கு அச்சம் இருக்கும் . ஆனால், பயப்படத் தேவையில்லை . சீனாவில் மோஸோ என்றொரு மூங்கில் வகை உண்டு . வளர்வதற்கான சூழலில் கூட அது வளர்ச்சிக்கான எந்த அறிகுறியையும் முதல் ஐந்து ஆண்டுகளுக்குக் காட்டாது . ஐந்தாம் ஆண்டிலிருந்து, நாளொன்றுக்கு இரண்டரை அடிவரையில் அசுர வேகத்தில் வளரும் . ஆறே வாரங்களில் 90 அடிகளைத் தொட்டுவிடும் . அந்த ஐந்தாண்டுகளில் அதன் வேர்கள் அவ்வளவு உறுதியாக மண்ணில் ஊன்றப்படுகின்றன . மெல்ல வளரும் குழந்தைகளை ஊக்குவியுங்கள் . அவர்களும் சாதிப்பார்கள் . --- நம்பிக்கை மின்னல்கள் நூலில் மரபின்மைந்தன் ம. முத்தையா .

வலைபாயுதே !

* " தேவதைக்கு ஆண் பால் இல்லை .
சாத்தானுக்குப் பெண் பால் இல்லை ! "
* " நான் ஃபுல் மீல்ஸ் வாங்கினால் லிமிட் ஆகவும் ,
லிமிடெட் மீல்ஸை ஃபுல் ஆகவும் சாப்பிடுகிறேன் ! "
* " தக்காளி, முட்டை விலை ஜாஸ்தியாகிடுச்சான்னு தெரியலை...
எல்லோரும் ஷூவைத் தூக்கி அடிக்கிறாங்க ! "
* ஒரு ரயில் பெட்டியில் கண்ட விளம்பரம் :" எல்.ஐ.சி பாலிசி
எடுத்துவிட்டீர்களா ? " # பொருத்தம் !
* " சிலர் சொல்வார்கள், ' நல்லவர்களைக் கண்டுபிடியுங்கள் .
தீயவர்களைப் புறக்கணியுங்கள் ! ' என்று . ஆனால், அது இப்படி
இருக்க வேண்டும் . ' ஒவ்வொரு மனிதருக்குள்ளும் நல்லதைக்
கண்டுபிடியுங்கள் . அவர்களுக்குள் இருக்கும் தீமைகளைப்
புறக்கணியுங்கள் ! ' யாருமே இங்கு பெர்ஃபெக்ட் கிடையாது ! "
* " எழுத்து ஒரு போதை . போதையில்கூட எழுத வேண்டும்
என்று தோன்றும் ! "
* " நடக்கிற ரயில் விபத்துகளைப் பார்த்தா, டிரெய்ன் டிக்கெட் புக் பண்ணினா,
' பர்த் ' கன்ஃபாம் ஆகுதோ இல்லையோ ' டெத் ' கன்ஃபாம் ஆயிடும்போல இருக்கே ? ! "
--- ஆனந்தவிகடன் . 25. 8. 2010.

நான்கு வழிச் சாலைப் பயணம் !

மிக மிகச் சுருக்கமாக, தினமும் உங்கள் தன்னம்பிக்கையை அதிகரித்துக்கொள்ள இந்த நான்கு விதிகளைக் கட்டாயம் கடைபிடியுங்கள் . 1 ) உங்களைப் படுக்கையில் இருந்து துள்ளியெழச் செய்யும் அளவுக்கு இலக்குகளை நிர்ணயித்துக் கொள்ளுங்கள் ! 2 ) உங்களுக்கு என்ன தேவை, உங்களுக்கு எது மட்டும் தேவை என்பதில் தெளிவாக இருங்கள் ! 3 ) உங்கள் இலக்கை அடைய உங்கள் உழைப்பு மட்டுமே போதுமானதாக இருக்குமாறு அமைத்துக் கொள்ளுங்கள் ! 4 ) இலக்குகளைச் சின்னச் சின்னப் பகுதிகளாகப் பிரித்துக்கொண்டு, பகுதி பகுதியாக நிறைவேற்றி வெற்றிக் கோட்டை எட்டிப்பிடியுங்கள் ! வாழ்த்துக்கள் ! --- கி. கார்த்திகேயன் . ஆனந்தவிகடன் . 5 . 5 . 10 .

வெளி நிறம் ஓர் மதிப்பல்ல !

பள்ளி மணி அடித்ததும்
புள்ளி மான்கள் போலவே
பிள்ளைகள் அனைவரும்
துள்ளி வீடு வந்தனர் .
கண்ணன் என்று ஓர் சிறுவன்
கண்கள் கலங்க வீடுவந்தான்
' கண்ணா ஏன் அழுகிறாய் ? '
கனிவோடு தாய் கேட்டாள்...
' கருங்குருவி என்று பலரும்
கிண்டல் செய்கிறார்களே...
வருத்தமாக இருக்கிறது '
என்று அழுதான் கண்ணனே !
' கறுப்பும் ஒரு நிறம்தானே ?
கண்ணீர்விடத் தேவையில்லை !
உருவத்தில் கறுப்பு இருக்கலாம்...
உள்ளத்தில் கறுப்பு கூடாது !
வெள்ளை உள்ளம் உனக்கிருக்க
வீண் அழுகை உனக்கெதற்கு ? '
அள்ளியணைத்த அம்மாவும்
ஆறுதலாய் அறிவு சொன்னாள் !
' வெளி நிறம் ஓர் மதிப்பில்லை '
உணர்ந்திட்டான் கண்ணனுமே
களித்திட்டான்... கவலைநீங்கி
கலகலவெனச் சிரித்திட்டான் !
--- எம். ஆனந்தி, வேலூர் . தினமலர் . ஆகஸ்ட் 20 . 2010 .

அறுசுவை மகத்துவம் !

எப்படி சாப்பிடணும் ?
முதலில் இனிப்பையும், பிறகு வரிசையாக புளிப்பு, உப்பு, காரம், கசப்பு, துவர்ப்பு ஆகிய சுவை கொண்டவற்றையும் சாப்பிட வேண்டும் . நிறைவாக, தயிரில் சிறிது உப்பு கலந்து சாப்பிட்டால் உணவு நன்கு செரிக்கும் . இந்த அறுசுவைகளும் அன்றாட உணவில் சமச்சீராக இருப்பதே ஆரோக்கியம் .
,-- தினமலர் .22 . 8 . 2010.